ကြားကာလပညာရေးအစီအစဉ်အတွက် Moodle Learning Management System (LMS) ကို အသုံးပြုကာ သင်ကြားသင်ယူရေးလုပ်ငန်းများကို စီမံခန့်ခွဲသွားမည်ဖြစ်သည်။ LMSကို အသုံးပြုခြင်းဖြင့် တက္ကသိုလ်တစ်ခုလုံး၏ သင်ကြားသင်ယူမှု အခြေအနေ၊ အတန်းအလိုက် အခြေအနေ၊ ဘာသာရပ်အလိုက်အခြေအနေများနှင့် ကျောင်းသားကျောင်းသူတစ်ယောက်ချင်းစီ၏ သင်ကြားသင်ယူမှု အခြေအနေများကို စီမံခန့်ခွဲနိုင်မည်ဖြစ်ပြီး၊ ကျောင်းသားကိုယ်တိုင်သည်လည်း မိမိ၏ သင်ကြားသင်ယူရေးလုပ်ငန်းစဉ်ကို ရှင်းလင်းစွာသိမြင်နိုင်မည်ဖြစ်သည်။ Moodle LMS တွင် ကျောင်းသားတစ်ဦးချင်းစီသည် မိမိ၏ ကိုယ်ပိုင် account နှင့် password များကို အသုံးပြုကာ ဝင်ရောက်ရပြီး ဗွီဒီယိုပို့ချချက်များ၊ ဖတ်စရာများ အစရှိသည့် သင်ကြားရေးပစ္စည်းများကို ရယူနိုင်ပြီး အတန်းအလိုက် ဘာသာရပ်အလိုက် အချိန်ဇယားများ၊ အသိပေးအကြောင်းကြားမှု များကို ရရှိမည်ဖြစ်သည်။ ထို့အတူ ဆရာသည်လည်း ကိုယ်ပိုင် account Passwordဖြင့် မိမိသင်ကြားရမည့် အတန်းနှင့် ဘာသာရပ်များကို စီမံခန့်ခွဲနိုင်သည်။ ကျောင်းသားနှင့် ဆရာကြားအပြန်အလှန် ဆွေးနွေးမေးမြန်းချင်းများကို လည်း LMS စနစ်အတွင်းတွင်ပင် ဆောင်ရွက်နိုင်သည်။